Hawid pagdayaw sa inkudan ug pagpugong na dili kaw maburag-ak pagkatawa kay sugdan ko na pagwaswas (kibale labhanan!) inin ato mga inpan-agihan nan elementary pa kita sa Falcon Memorial Elementary School.
Dili sa gayud mosipyat na kada buntag maglinya kita sa oval para moapil sa flag ceremony. Tapos mag-eksersayes dayon taraw. Si Maam Julie Pilapil an magled. 1988 yadto, grade two pa kami. Yatinga kami nanga yaon sa gayud maangkuti na baho nan tae. Kalisudi inin magkanta kita nan bayang magiliw na magsampong nan ilong. Tinan-away namo sa amo sapatos kay basin yakagiod kami. Wara sa gayud. Pagsilib ko gayud sa bag nan ako klasmeyt, yaon say amo da nan lapok. Inkawhit taraw niya tapos insimhot. Laong niya dayon tae sa baya. Ambaya kaw, yaakaigit siya sayuhe pa sa buntag.
Nan grade three na sab kami. Grabe an pag-uso yadto nan winner. Yaon maglanat-lanatan bitaw tapos binunuay nan bola na hininang sa lukay nan niyog. Kundili yaon bola sa tennis an gamiton. Malakihi si Joeven Cabrera nan yaon. Yaon pa sab taraw gira-girahan na bolpen an gamiton, balahan nan lastiko. Wara lagi kit-an mo na bolpen sa una na dili baliko an tumoy.
Si Batsong ug si Ricky gapatuga-tuga sab nan kabuang. Madyekero ug karatista kuno sila. Buk-on gud taraw nila an botelya sa O, ambaya kaw binuak na daan. Yadi pa sab si Earl Alvarado na kon uso pa daan sa una an kamera na selfon, sigurado na may tinampalas na salida iton siya na an taytol – Biga sa Kapayahan. Wara gayud makalabaw sa iya na pagkatampalasan.
Labay an isa ka tuig, grade four na kami. Kon ikaw mingradwar sa falcon, dili mo sa gayud kalimtan na basta under kaw ni Maam Pareja, magtanom sa gayod kamo nan mani kundili kamote sa atbang nan iyo rom. Nilay-ubay gayud basta manlukat na. Abi pa sa lamang mapon-ukan an kaselyasan kay may intubol na klasmeyt namo.
Basta taga-tago kaw dili mo kalimtan yadton pagkaon bitaw na buntag-hapon pasui pa na isuroy sa tago nan mga bata. Isa ngadto sa mga bata na magsuroyay pikot an talinga. Kadumdom kamo siguro yadton binanggod na kalibre na may bukhayo sa tunga. Produkto yadto nan amo klasmeyt na si Levie Ronquillo ug Pikot. Taka-taka kami nan yadto. Inday kon hain na sila kuman.
Nan grade five ug grade six na gayud kami. May klase na sa taraw na H.E. Palutuon dayon taraw kami ni Maam Roces nan pikols na kapaya. Tapos permi taraw manhinlo nan H.E. kada hapon. Na kay maldituhe sa gayud kami, kadtuon taraw namo si Maam Roces ibanon namo si Euvics, anak ni Nong Lalo Acevedo, na kuhaon an yawi kay maghinlo kami. Lipaye na taraw si mam, ambaya kaw maturog kami ngadto.
An pinaka-haylayts nan tanan yahitabo sa falcon yadton kon lang-on nato amo da nan sa salida. Si Sir Blasco, principal namo yadto na panahon, ug si Lucas, anak ni Sensio Lozada, an gada nan bida. Dili sa una mabali-bali an flagpole sa falcon. Kinahanglan kat-katon mo gayud basta itaod mo an pisi. Taasers pa gayud yadto. Abteke sa gayod sa tanan estudyante si Lucas mokat-kat nan flagpole. Sugoa dayon siya ni Sir Blasco na magtaod nan pisi. Magkaalas noybe yadto nan buntag. Dali-dali taraw si Lucas panik nan flagpole, wara baya siya kasayod na gabok na baya. Nan hapit na gayod siya sa tomoy, kabali pakaw an poste. Singgit si Lucas, “Siiiiiiiiiiiiiiiiiiiiiiiiiiiiirrrrrrr….!” Paglingi ni Sir Blasco gaananay na sa pagtugdang sa lupa an poste iban si Lucas, bawos sab siya siyaget samtang kadagan, “Lucasssssssssssssssssssssssss!” Daog pa sab nila an mga aktor sa sine. Inkabag-uhan lagi nila an poste. Amo na yaon makit-an niyo na stayl sa flagpole nan falcon kuman.
No comments:
Post a Comment